నెనరు !!(మోహం ,వలపు )

*చెలికాడా !నెనర్లు !(కృతజ్ఞతలు )
నీ ప్రక్కన ఓ నిముషం కూర్చునే ,
చనువుంటే చాలనుకున్నాను .
నీ ముఖాన్ని చేతులలో తీసుకొని ,
నీ నుదుట ముద్దాడ గల్గితే ...
అదే భాగ్యమనుకున్నాను .
ఎన్ని వసంతాల నిరీక్షణిది?
చివరికి ...........నా ప్రేమ ,
నీ వాంఛలో సఫలీకృత మైంది .
నువ్విచ్చిన కాన్క నా చిన్ని
దోసిట చాలక .........
పొంగి పొర్లి పోతోంది .
కాముని చెరకు వింటి నుంచి పుట్టావో ఏమో ....
నాలో నివురు గప్పిన కాంక్షా జ్వాలను ,
నులి వెచ్చని నీ స్పర్శతో రగిల్చావు .
కారు మబ్బులా కమ్మేస్తావ్ ....
వెనువెంటనే వర్షిస్తావ్ .....
నీ తలపుల్ని మాత్రం నాకొదిలి ,
నువ్వు నిష్క్రమిస్తావ్ ......
ప్రియతమా !
ఆ తలపుల వాకిటే నిలుచుని
నీ ఆకస్మిక ఆగమనాన్ని తలుచుకొంటూ,+
కలలు కంటాను ......