శాశ్వతం కాని బంధం!?

నీవూ నేనూ నిన్నా ఉన్నాము, నేడూ ఉన్నాము

ఉందో లేదో తెలియని రేపటికోసం ఏ కలకనను?

అహంకారం మనిద్దరిమధ్యా గోడ కడుతూ వుండేది

వెనువెంటనే మమకారం దాన్ని పడగోట్టేసేది

ఇది నిరంతరం..... శాశ్వతం అనుకున్నాను కాని

చుక్కాని లేని నావలా నన్ను నడి సంద్రంలో విడిచిపెట్టి

నువ్వుమాత్రం దూరతీరాలకు పయనమౌతున్నావు

లేనిది ఎప్పటికీ వుండదు వున్నది ఎప్పటికీ లేకపోదు

అంటూ వేదాంతం చెబుతున్నావు అది నిజమేనేమో

ఐనా.....

నీలా తామరాకుపై నీటి బొట్టులా ఉండలేకపోతున్నా

శాశ్వతం కాని బంధాల్ని ఓ కన్నీటి బొట్టుతో విడువలేకున్నా!